Ante diem VI Idus Martias religionis causa discipuli nostri septem ecclesias quae summi ponderis in Urbe habentur, Patre Mirano Praeside nostro duce, inviserunt.
/n
Multo mane discipuli hora constituta coram Basilica Sancti Petri congregati peregrinationem pietatis studio inierunt votivam. Primum iter longum in Basilicam Sancti Pauli extra muros fecerunt, deinde, in campo ubi catacumba sita est Callixti prandio mediocri satiati, Basilicam Sancti Ioannis in Laterano perlustraverunt, unde cum Basilicam Sanctae Crucis in Hierusalem tum Basilicam Sancti Laurentii extra muros fido animo petiverunt, denique in Basilica Sanctae Mariae Maioris finem huius viae imposuerunt. Quo facto, discipula nostra cum humanissima tum largissima nomine Maria Graeca ceteros discipulos longo itinere fatigatos domum invitavit ad cenam qui dapibus optimis merito epularentur. (Composuit Paulus Liu Xun)